Përpjekja për arratisje dhe njeriu i ri

Në foto Kostandin Gjordeni në vitin 1984

Nga Kastriot Dervishi

Kostandin Sotir Gjordeni, i vitlindjes 1957; Kristaq Gaqo Babi, i vitlindjes 1950, Alma Kristaq Babi e vitlindjes 1973 (9 vjeç) dhe Nebi Haziz Koka lindur në Shkinak të Kukësit në vitin 1963, banues në Katundin e Ri, Durrës (i cili vazhdonte shkollën e mesme ekonomike në Lezhë), bënë planin të arratiseshin. Më 5.8.1982 udhëtuan me tren deri në Mjedë, e më pas, me makina të ndryshme shkuan në Kukës. Fjetën jashtë. Të nesërmen, nisen nga ora 9.30. Deri në Bicaj shfrytëzuan autobusin e më pas me makina rasti deri në sektorin e sharrave Kolesian. Nga këtu udhëtojnë 15 kilometra në këmbë. Rreth orës 21.30, kur ishin vetëm 2.4 kilometra larg kufirit, kapen nga sekretari dhe zëvendëssekretari i partisë së kooperativës së fshatit Çaj.

Nebi Koka u largua me vrap. Ndërsa këtë moment dy komunistët i kërcënojnë me kosore bari dhe më pas i lidhin dhe i dërgojnë në një stan, e të nesërmen i dërguan në Degën e Punëve të Brendshme Kukës. Për Nebiun u dha alarmi për postat kufitare, repartet e ushtrisë dhe forcat vullnetare. Shkuan në Çaje, Shkinak, Fshat e Lusen, zëvendëskryetari i DPB-së, shefi i Hetuesisë, komisari i batalionit të kufirit, shefi i kundërzbulimit të kufirit, punëtori operativ dhe punëtori i policisë.

Nebi Hoxha pasi ishte ndarë nga grupi u fsheh në pyllin e Buzëmadhes. Natën e datës 8.8.1982 shkoi te daja në Lusën, por ky e dorëzoi.

Pas një jave, të katërt i çuan në Durrës. Por zbritja në qytet u shoqërua me një skenë. Të tre të rinjtë i lidhën me litar nga duart, ndërsa makina ecte me shpejtësi të ulët. Kjo skenë bëhej që populli të shikonte se “armiqtë” ishin kapur dhe ky fat i priste të gjithë ata që do mendonin të arratiseshin. Kostandini u dënua me 11 vjet heqje lirie. Edhe të tjerët morën dënime të rënda.