Çka janë vlerat e luftës së UÇK-së?

Nga Basri Beka

Vlerat e luftës së UÇK-së nuk janë dekor. Nuk janë vetëm emra dëshmorësh në pllaka përkujtimore, as slogan që përdoret për interesa të ditës.

Ato janë parimet për të cilat u luftua, u sakrifikua dhe mbi të cilat duhet të ndërtohet Kosova.

1. Liria – Synimi themelor ishte çlirimi i Kosovës nga regjimi represiv dhe sigurimi i së drejtës së shqiptarëve të Kosovës për të jetuar të lirë.
2. Çlirimi dhe vetëvendosja – Lufta u zhvillua në funksion të çlirimit politik e kombëtar dhe të së drejtës së popullit të Kosovës për të përcaktuar vetë të ardhmen e tij.
3. Mbrojtja e popullsisë civile – Mbrojtja e njerëzve nga dëbimet, vrasjet dhe dhuna ishte një nga arsyet kryesore që e bëri luftën të domosdoshme për shumë kosovarë.
4. Sakrifica – Mijëra njerëz morën pjesë drejtpërdrejt në luftë, ndërsa qindra mijëra të tjerë bartën pasojat e saj. Dëshmorët dhe viktimat civile mbeten në qendër të kujtesës së kësaj lufte.
5. Bashkimi rreth çështjes së lirisë – UÇK-ja arriti të mobilizojë njerëz me prejardhje, bindje dhe orientime të ndryshme politike rreth një objektivi të përbashkët: lirisë së Kosovës.
6. Solidariteti – Lufta nxiti një mobilizim të gjerë shoqëror. Luftëtarë, familje, mërgata, humanitarë, gazetarë dhe qytetarë kontribuuan, secili në mënyrën e vet, për çështjen e lirisë.
7. Aleanca me botën demokratike – Ndërhyrja e NATO-s në vitin 1999 ishte vendimtare për përfundimin e luftës dhe tërheqjen e forcave jugosllave nga Kosova. Kështu, çështja e Kosovës u vendos në kuadrin e sigurisë euroatlantike.
8. Shteti demokratik dhe laik – Kosova e pasluftës u ndërtua si republikë demokratike, multietnike dhe laike. Kjo do të thotë se shteti nuk i përket asnjë feje dhe se qytetari nuk duhet t’i nënshtrohet imponimit fetar. Liria e besimit është e drejtë; imponimi i besimit nuk është vlerë e luftës.
9. Respekti për jetën dhe dinjitetin njerëzor
10. Ndërtimi i shtetit pas çlirimit – Kuptimi i sakrificës nuk përfundon me mbarimin e luftës. Liria duhet të shndërrohet në shtet funksional: në ekonomi, industri, siguri, arsim, drejtësi dhe mirëqenie.

Këto janë vlerat e luftës së UÇK-së.

Prandaj, ta mbrosh luftën nuk do të thotë ta kthesh atë në mit të paprekshëm. Do të thotë ta mbrosh të vërtetën historike, sakrificën e njerëzve dhe idealin për të cilin u luftua.

Dëshmorët nuk ranë që ne vetëm të flasim për lirinë.

Ranë që Kosova të jetë e lirë.

Dhe detyra jonë sot është që atë liri ta kthejmë në shtet të fortë, demokratik, laik, të sigurt, të zhvilluar dhe të lidhur me botën euroatlantike.