SI DUHET TË USHQEHENI NË FAZËN E MENOPAUZËS ?
Megjithëse menopauza mund të jetë një periudhë sfiduese për shumicën e grave, ka disa gjëra që mund të bëhen për të mbajtur shëndetin e duhur edhe në këtë fazë.
NGA AJSHE LEKA
Nivelet e hormoneve në rënie, sidomos estrogjeni, stresi dhe gjumi i papërshtatshëm, bëjnë që disa femra gjatë menopauzës të jenë të prira për të fituar peshë, veçanërisht në pjesën e barkut. Për fat të keq, shtimi në peshë gjatë menopauzës nuk është vetëm një gjë e pakëndshme, por dhe e dëmshme për shëndetin. Yndyra që shtresohet nën muret e barkut, ndërlidhet me një rritje të rrezikut për sëmundje të zemrës, presion të lartë të gjakut dhe rezistencë të insulinës, gjë që mund të çojë në diabet.
Ka disa gjëra që mund të bëhen për të mbajtur shëndetin e duhur edhe në këtë fazë mjaft sfiduese për shumicën e grave. Me një mënyrë jetese aktive dhe një dietë të shëndetshme, mund të ndiheni më rehat gjatë kësaj periudhe të jetës suaj.
• Aktivitetet fizike
Teksa plakemi, natyrisht që humbim peshën e muskujve. Nëse nuk e zëvendësojmë atë muskul të humbur, trupi ynë do të ketë më pak muskuj, gjë që do të ngadalësojë nivelin metabolik. Qëndrimi aktiv fizik në vitet ’40 dhe ’50 të moshës, ndihmon në ruajtjen e metabolizmit tuaj.
Lëvizja duhet të jetë pjesë e rutinës tuaj të përditshme. Udhëzimet e aktiviteteve fizike kombëtare rekomandojnë një minimum prej 150 minutash në javë të aktivitetit aerobik si dhe stërvitje të forta, të paktën dy herë në javë.
• Të ushqyerit e shëndetshëm
Ushqimet e mëposhtme janë veçanërisht të dobishme për gratë në fazën para menopauzës, ose gjatë menopauzës:
Bananet së bashku me kajsitë, avokadot dhe patatet e ëmbla, përbëjnë sasi të larta të kaliumit, gjë që ndihmojnë në rregullimin e presionit të gjakut.
Boronica është plot me antioksidantë të cilët parandalojnë oksidimin e substancave të njohura si radikale të lira, vitaminë C e cila përpos që vepron si antioksidant në organizëm, zvogëlon rritjen e nivelit të hormoneve (kortikosteronit), që shkakton stresin. Marrja e rregullt e vitaminës C mund të mbrojë nga ndikimet e dëmshme të stresit, gjithashtu stimulon sistemin e imunitetit derisa fibrat luajnë një rol të rëndësishëm në sistemin tretës.
Zarzavatet errëta me gjethe janë të pasura me kalcium dhe vitaminë K, të cilat ndihmojnë shëndetin e kockave. Gratë mbi 50 vjeç duhet të marrin 1.200 miligramë kalcium çdo ditë.
Peshku salmon dhe ushqimet e pasura me Omega-3 rrisin kolesterolin e mirë. Peshqit me vaj, gjithashtu janë burime të mira të vitaminës D, që ndihmon absorbimin e kalciumit. Nevojat ditore për vitaminë D janë 600 UI.
Bukë tërësisht me kokërr dhe bollgur. Studimet tregojnë se fibra e tretshme mund të ndihmojë trupin tuaj të heqë kolesterolin. Kërkesa për fibra zvogëlohet në moshën 50 vjeç, kështu që duhet synuar 21 deri në 30 gramë fibra totale në ditë.
Uji nuk siguron energji por shërben për shumë procese tjera, të cilat janë shumë të rëndësishme për organizmin tonë. Mirëmban temperaturën konstante të trupit, shpërbën shumë materie toksike në trup, prandaj njihet për efektin e tij antioksidues etj.
Kosi është i pasur me kalcium, që padyshim është një nga mineralet më të rëndësishëm për shëndetin e kockave dhe një probiotikë që mund të ndihmojnë tretjen, të rrit imunitetin si dhe ndihmon shumë në djegien e yndyrave.
Gratë në menopauzë duhet të kenë kujdes në marrjen e natriumit. Kripa është thelbësore për shëndetin, sepse ndihmon në ekuilibrin e drejtë të lëngjeve në trup, ndihmon në transmetimin e impulseve nervore, si dhe ndikon në tkurrjen dhe relaksimin e muskujve, por është shumë e rëndësishme të mos teprohet konsumimi i saj.
……………………….
Autorja është konsulentë për nutricion dhe dietologji: fb.com/nutricistedietologe
