DEFEKTET E NJË INTERVISTE
Nga Gjokë Dabaj
Sapo u transmetua në Top Channel një intervistë e z. Ilir Paço me z. Nikollaq Karamelo. Bëhej fjalë për disa kërcënime që i ka marrë z. N. Karamelo, për shkak se e paska paraqitur Korçën, në shkrime apo në një mënyrë tjetër, si qytet ku një pjesë e banorëvet janë me kombësi greke.
Intervista pati defekte në transmetim. U ndërpre disa herë. Rrjedhimisht, unë mbeta i paqartë për shumë gjëra. Prandaj dhe po i formuloj disa pyetje, me qëllim për të plotësuar atë çfarë intervista la mangut.
- Deri ku shtrihet Greqia Veriore sipas konceptit tuaj, z. N. Karamelo?
- A ka në Republikën Greke pakica kombëtare të njohura me kushtetutën e atij shteti dhe cilat janë?
- Arvanitët çfarë janë, në pikëpamje kombëtare, dhe a i njeh arvanitët kushtetuta e shtetit grek si pakicë kombëtare jogreke?
- Ku gjendet Çamëria gjeografikisht? Në Shqipëri apo në Greqi? Po pyes: Gjeografikisht, sepse shtetërisht e dimë që gjendet në Republikën Greke.
- A ka në Korçë minoritet grek dhe a mund të jepni emra familjesh? Cilat familje korçare janë me kombësi greke dhe sa familje të tilla ka në Korçë?
- Kosturi, Follorina, Konica, Janina, a gjenden gjeografikisht në Shqipëri apo në Greqi? Them gjeografikisht, sepse shtetërisht e dimë.
- Si mendoni ju, z. Nikollaq: Korça, Erseka; Leskoviku, Përmeti, Gjirokastra, Saranda, Himara, a gjenden gjeografikisht në Shqipëri apo në Greqi?
- Kur bëhet fjalë për të këtilla tema, shumë delikate, besoj se nuk është keq të mbahet parasysh edhe një kusht tepër i rëndësishëm: Nëse vërtet duam të shkojmë mirë njëri me tjetrin, shqiptarë edhe grekë, nuk duhet të fshehim a lëmë mënjanë asnjë të vërtetë. Ju, a e keni pasur parasysh një kusht të këtillë në deklarimet dhe në shkrimet tuaj të derisotëm?
- Një studiues skrupuloz, kur flet, për shembull, për pakicat kombëtare greke që, sipas tij, jetojnë në Republikën e Shqipërisë, a nuk duhet të flasë edhe për pakicat (apo shumicat) kombëtare shqiptare që jetojnë në Republikën Greke? Apo duhet të jetë i njëanshëm dhe të justifikohet duke thënë: Unë nuk e kam studiuar këtë krahun tjetër të këtij problemi. Ose edhe më keq: Mua nuk më interesojnë shqiptarët në shtetin grek. Mua më interesojnë grekët në shtetin shqiptar. Kjo është fusha ime e interesit.
- Dhe në fund, m’u duk sikur në mbarim të intervistës, ju, z. Nikollaq Karamelo, e përfshitë edhe Korçën në konceptin Greqi Veriore. A thatë vërtet, apo s’e dëgjova mirë?!
Ndërsa për z. I. Paço kam këto pyetje:
- A mendon ti, z. Ilir, se duhet të njihet në kushtetutën e Republikës Greke bashkësia shqiptaro-arvanite si kombësi më vete?
- A mendon ti, z. Ilir, se në Republikën Greke duhet të hapen shkolla në gjuhën shqipe të të gjithë nivelevet, financuar shtetërisht, ashtu siç kemi ne në Republikën e Shqipërisë, shkolla në gjuhën greke të të gjithë nivelevet?
- A do të më thërrasësh edhe mua në një intervistë, siç thirre z. Nikollaq Karamelo? (Cel: 0692567880)
Pjezë, 17 qershor 2021.
