Pse konflikti Rama-Kurti është parimor e jo personal?
Nga Enver Bytyçi
Shumë prej analistëve, opinionistëve dhe politikanëve që i shohim në ekrane e trajtojnë konfliktin tashmë të njohur, Rama-Kurti, si një çeshtje personale midis tyre për shkak të egos e prirjes për të dominuar njëri-tjetrin. Eshtë e vërtetë se karakteri, formimi, cilësitë, veset, virtytet e liderëve politikë luajnë rol në marrëdhënien me homologët, partnerët, aleatët, kolegët e vartësit e tyre. Në këtë kuptim, studimi dhe informacioni për këto karaktere është tashmë pjesë shumë e rëndësishme edhe e veprimtarive agjenturore e të spiunazhit. Sepse zbulimi i këtij dimensioni favorizon gjetjen e dobësive të kunërshtarit dhe intervenimin për neutralizimin ose korruptimin e tij. Me kryeministrin e Shqipërisë ka ndodhur pikërisht kjo që theksova më lart. Ai është tashmë peng i Serbisë për shkak se Beogradi dhe Aleksandër Vuçiq kanë shfrytëzuar të gjitha dobësitë e kreut të ekzekutivit shqptar për ta vënë atë në shërbimin e tyre. Dhe ia kanë arritur, për fat të keq!
Por nuk ka ndodhur e njëjta gjë me kryeministrin e Kosovës. Sjelljet dhe veprimet e tij deri më so,t në mbrojtje të territorit dhe sovranitetit të shtetit të Kosovës, dëshmojnë se zoti Kurti nuk është peng i korrupsionit, i implikimeve në veprimtari mafioze e kriminale, as edhe peng i Serbisë dhe armiqve të tjerë të Kosovës. Dhe në fakt sjellja e Albin Kurtit është e kundërta e sjelljeve që shohim te Edi Rama. Por ne, për të provuar hipotezën, nëse konflikti Rama-Kurti është personal apo jo, do të ndalemi te krahasimi i qëndrimeve, sjelljes politike dhe konvensionit në raportet me Serbinë, dialogun dhe ngjarjet që kanë ndodhur në Kosovë e sidomos në veriun e saj këto vitet e fundit.
- Kryeministri shqiptar, së bashku me presidentin e Serbisë, pas një marrëveshjeje të mëparshme në Nish, gjithnjë sipas zonjës Biserko, nisën në vitin 2017-2020 aksionin diplomatik dhe politik për zgjidhjen e konfliktit Kosovë-Serbi përmes ndryshimit të kufijve dhe ndarjes së Kosovës. Në këtë aksion tërhoqën edhe presidentin e Kosovës, Hashim Thaçi. Kjo temë është e njohur tashmë. Ndërsa kryeministri Kurti, asokohe në opozitë, u shpreh publikisht kundër këtij projekti. Pra që në fillim konflikti nisi si pozicion pro dhe kundër kërkesës së vazhdueshme të Serbisë për ndarjen e Kosovës si kusht i paqes dhe bashkëjetesës midis dy popujve. Them midis dy popujve, sepse Kosova pas ndarjes nuk do të ishte më shtet i pavarur. Pjesën e mbetur do ta merrte Shqipëria. Në këtë konflikt midis dy kryeministrave shqiptarë nuk dallohet dot asnjë nuancë e sjelljes së bazuar në karakter, por në parime dhe të drejtën ose të padrejtën.
- Kur Albin Kurti u zgjodh kryeministër në qeverisjen e tij të parë, pas disa muajsh apo një viti, ai u rrëzua nga pushteti. Shkak u bë fakti se ishte kundër të firmoste marrëveshjen me Serbinë sipas projektit Rama-Vuçiç-Thaçi për ndarjen e Kosovës. Ky projekt u mbështet në këtë kohë edhe nga i pushtetshmi i administratës së Trump, Richard Grennell. Ky i fundit aktivizoi Thaçin, Ramën dhe miqtë e tyre në LDK dhe e rrëzuan qeverinë Kurti 1. Të gjithë e dimë se ajo qeveri u rrëzua për shkak të kundërshtisë së kryeministrit për të shkuar së bashku me presidentin në Uashington për firmosjen e marrëveshjes në fjalë dhe siç thoshte Thaçi “për ta hequr qafe Serbinë njëhherë e mirë nga Kosova”! Pra nuk kishte asgjë personale as në këtë konflikt të njohur tashmë, të cilin e vlerësuan qytetarët e Kosovës dhe votuan sërishmi pas disa muajsh me mbi 50 për qind pro zotit Kurti e koalicionit të tij.
- Në qeverisjen e këtyre tri viteve sërishmi kryeministri Kurti u desh të përballej me avokatinë e kryeministrit të Shqipërisë për Serbinë, aq sa gazetari i FAZ, Martens, thotë se “Kryeministri Rama është kryeministri më i mirë shqiptar për Serbinë, që nga koha e Pashiqit”(1913-1926 kryeministër)!
Asnjëherë qeveria e Kosovës nuk pati mbështetjen e qeverisë së Tiranës në këto tri vite sa i përket qëndrimeve të saj në mbrojtje të sovranitetit dhe integritetit territorial të Kosovës! Gjithmonë kryeministri i Shqipërisë u përpoq ose të mbajë anën e Serbisë, ose të qëndrojë neutral, në komoditetin e Joseph Borrell. Aq sa në qershor 2023 anulloi 15 orë para se të mblidhej takimin e përbashkët të të dy qeverive në Gjakovë. Ndërsa në fund të shtatorit 2023 zhvleftësoi aksionin perfekt të policisë së Kosovës për asgjësimin e grupit terrorist të Banjskës, kur tha se “Veriu i Kosovës është tokë e askujt”! Edhe në këtë rast dallohet qartë se konflikti midis Ramës dhe Kurtit është për shkak të qëndrimeve të kundërta parimore, pro dhe kundër integritetit territorial të Kosovës!
- Ndërsa qeveria, presidentja Osmani dhe institucionet e Kosovës kërkojnë me ngulm që Serbia të mbajë përgjegjësi dhe të kërkojë ndjesë për genocidin që shkaktoi në fund të shekullit të kaluar kundër shqiptarëve, kryeministri Rama e quan këtë genocid produkt “të një rrëmuje ballkanike”, ku të gjitha palët kanë përgjegjësi! Kjo tezë është kryekëput e njjëjtë me tezën serbe se “Lufta në Kosovë ishte një luftë civile me viktima të dyanëshme”!
Përpjekja për t’i ikur përgjegjësisë së genocidit të tmerrshëm në Kosovë nga ana e Serbisë ka gjet kësisoj përkrahjen e vazhdueshme të kryeministrit të Shqipërisë “në emër të së ardhmes”! Por ne e dimë se as e sotmja as e ardhmja, madje as e shkuara nuk kanë asnjë rëndësi për kryeministrin shqiptar. E vetmja gjë e rëndësishme është paraja dhe pushteti! Edhe në këtë rast nuk gjendet asnjë shënjë se midis Kurtit dhe Ramës ka e mund të ketë diçka personale.
Për ta provuar tezën që thashë më lart, mund të përmdn pa fund fakte, prova dhe argumente. Por këto mjaftojnë për këtë qëllim! Prandaj dhe i duhet thënë mjaft teorisë, sipas së cilës, dy kryeministrat shqiptarë luftojnë për dominim e ego. Së paku Albin Kurti është i pozicionuar qartë kundër bashkëpunimit Rama-Vuçiq kundër Kosovës! Kjo mjafton!
