16/07/2024

Marrëzia e intrigës me fjalimin e Bill Clinton të 3 korrikut në Tiranë

0

Nga Enver Bytyçi

Një përkthyes i porositur shtrembëroi fjalimin e Bill Clinton në pritjen që Edi Rama i bëri presidentit amerikan, ikonë të shqitarëve, më 3 korrik 2023! Dhe bazuar në fjalët që media transmetoi, Clinton u bë objekt kritike nga ana e shqiptarëve. Fjala e tij përmes keq-përkthimit kishte për qëllim që t’i thuhej zotit President se “Shqiptarët, sidomos ata në Kosovë, megjithëse i çlirove nga sundimi, regjimi e pushtimi i Serbisë, janë vënë kundër jush”! Qëllimi tjetër ishte të atakohej kryeministri I Kosovës në gojën e çliruesit të popullit shqiptar në Kosovë, por përmes shtrembërimit të deklaratës së tij në përkthim. Dhe t’Iithuhej më pas zotit Clinton se tashmë Kosovën e drejton një kryeministër, i cili nuk është mirënjohës ndaj jush!

Për këtë arsye presidenti Clinton u detyrua të japë një intervistë për gazetën e famshme e të njohur në botë, ”Financial Times” dhe në mënyrë elokuente të përgënjeshtrojë ato që ia përkthyen keq në shkallët e kryeministrisë së Shqipërisë më 3 korrik. Në këtë intervistë ai thotë qartë se “Ekstremistët serbë mbajnë peng paqen midis Kosovës dhe Serbisë e në rajonin e Ballkanit”. Madje pohon se këta ekstremistë po zhgënjejnë popujt e rajonit pas atyre arritjeve që u hodhën në vitet e shkuara!

Manipulimi dhe intriga është një nga tiparet e oligarkive, kleptokracive dhe autokracive! Kjo dihet dhe askush nuk mund të presë që kryeministri i Shqipërisë, apo presidenti I Serbisë dhe ndihëmësit e tyre të afërt të harrojnë profesionin e manipuluesve dhe intrigantëve. Por që intriga dhe manipulimi të shkojë deri në shtrembërimin e fjalimit të presidentit të nderuar amerikan, Bill Clinton, këtë askush nuk e kishtë menduar!

Është e qartë se Clinton është paguar të bëjë vizitën në Tiranë, si qokë për rehabilitimin e Edi Ramës edhe në administratën amerikane pas skandalit Rama-MecGonigal. Ai ndoshta nuk ka haber për këtë skandal. Por nuk do të besonte askush se organizatorët dhe sponsorët e kësaj vizite do t’ia shtrembëronin edhe fjalët, me qëllim për t’ia kundërvënë opinionin shqiptar atij. Ky interes ishte vetëm i Edi Ramës, i cili donte me këtë rast të përligjte fabulën se “Këta (shqiptarët) jo vetëm mua, por kanë problem deri me presidentin Clinton”! E gjithë regjia shkoi në funksion të imazhit të Edi Ramës. Prandaj ai i la në hije të gjitha institucionet e vendit gjatë pritjes që organizoi për njeriun e paqes në Ballkan.

Megjithatë, kjo do të duhet të jetë një mësim tjetër i madh për presidentin Clinton. Fatkeqësisht i duhet të mësojë edhe në këtë moshë, sepse u beson djajve që e kurdisën në këtë inskenim të turpshëm! I duhet të mësojë faktin se ka donator e sponsor të ndershëm, të cilët i hedhin paratë për të mirën e njerëzimit dhe e ftojnë atë në këtë shërbim. Por edhe se ka donatorë e sponsorë suzarë, që çdo investim financiar e çojnë në favor të privilegjeve të tyre të pandershme dhe madje të turpshme e kriminale.

Se Clinton-it iu shtrembëruan fjalër për të dhënë mesazhin se “Edhe personi i cili çliroi Kosovën është për ndryshimin e kufijve dhe ndarjen e Kosovës”, kjo tashmë nuk do kallauz! Se Bill Clinton u përdor në funksion të denigrimit të atyre që mbrojnë integritetin territorial të Kosovës e kryesisht të kryeministrit të kësaj republike, zotit Kurti, edhe kjo nuk ka nevojë për koment! Se Bill Clinton u përdor në këto rrethana për të favorizuar oreksiet e Beogradit në Kosovë, edhe kjo është e qartë si drita e diellit! Por që e gjitha të bëhej me regjinë e tjetërsimit, mos-përkthimit, apo shtrembërimit të fjalës së tij, këtë nuk e priste askush!

Prandaj dhe ai djali që dje në Prishtinë e thirri Edi Ramën me emërtimin e merituar “tradhtar”! duhet përshëndetur dhe duhet shpërblyer! Atdhetaria, patriotizmi, nacionalizmi modern shqiptar, vlerat e shoqërive të përparuara, duhet t’i dënojnë akte të tilla, të shtrembërimit dhe falsifikimit të fjalëve të autorëve të mëdhenj, jo vetëm të formatit të stërmadh të Bill Clinton! Dikush duhet të marrë përgjegjësi për këtë akt. Përkthyesi apo përkthyesja duhet të merret në përgjegjësi penale dhe nga hetimi duhet të shkohet deri te ata që kanë dhënë një porosi për këtë. Ndryshe nuk pastrohet kjo marrëzi!

Leave a Reply

Your email address will not be published. Required fields are marked *

error

Nese e pelqyet ket artikull? Ju lutemi përhapni fjalën :)

Follow by Email
YouTube
YouTube
Tiktok