FUQIA E LUTJEVE

Nga Frank Shkreli
Ashtu si çdo vit tjetër edhe sivjet, mijëra pjesëmarrës nga e mbarë bota, përfshir udhëheqësit më të lartë Shteteve të Bashkuara dhe personalitete të ftuar nga mbarë bota, ishin të pranishëm në organizimin vjetor, “Prayer Breakfast” ose Mengjesi i Lutjeve, në Washington. Për dekada tani, është bërë traditë që në këtë tubim të ketë marrë pjesë çdo president i Shteteve të Bashkuara, ç’prej Dwight Eisenhower-it, në vitin 1953, e deri në ditët e sotëme.
Mengjesi i Lutjeve mbahet çdo vit, zakonisht të ënjtën e parë të muajit Shkurt. Është kjo një ngjarje ku marrin pjesë rreth 3500 të ftuar, përfshirë edhe personalitete politike ndërkombëtare dhe të tjerë, nga më shumë se 150-vende të ndryshme të botës dhe nga të gjitha 50-shtetet e Amerikës. Ky takim vjetor organizohet nën mbikqyrjen e antarëve të Kongresit të Shteteve të Bashkuara, në emër të një Fondacioni të Krishtërë. Ky takim bëhet në një mënyrë të tillë, që përveç lutjeve, shërben gjithashtu edhe si një forum elitash politike, shoqërore dhe tregtare, për tu takuar dhe për të lidhur miqësi e njohuri me njëri tjetrin. Gjatë dekadave, përveç presidentëve të Amerikës, aty kanë folur edhe udhëheqës dhe personalitete amerikane dhe nga mbarë bota, përfshir Nënë Terezen, e cila ka mbajtur fjalimin kryesor para këtij tubimi, në vitin 1994.
Këtë vit, Mengjesi i Lutjeve është organizuar nga dy senatorë të Shteteve të Bashkuara, Senatori Chris Coons, demokrat i shtetit Delaware dhe Senatori republikan James Lankford, i shtetit Oklahoma. Është traditë që ky tubim të organizohet gjithmonë nga një demokrat dhe një republikan, e të cilët njëherazi shërbejnë edhe si bashk-kryetarë të këtij tubimi. Me rastin e emërimit të tyre për të organizuar Mengjesin e Lutjeve të këtij viti, të dy senatorët kanë theksuar rëndësinë që ka feja, si diçka që i bashkon ata. Senatori Coons u shpreh se ishte i nderuar që së bashku me kolegun dhe mikun e tij, Senatorin Lankford po kryesonte tubimin e këtij viti. “Në një kohë kur vendi ynë dhe Kongresi janë të përçarë, kemi nevojë që të gjëjmë më shumë mënyra dhe mundësi për të dëgjuar njëri tjetrin, për të besuar në njëri tjetrin dhe njëherazi të kujtojmë se duhet edhe të duam njëri tjetrin dhe të kujdesemi për të afërmin tonë. Për mua, ashtu si edhe për miliona amerikanësh të tjerë, lutja është një mjet tepër i fuqishëm për të bashkuar njerëzit që i përkasin feve të ndryshme, të dëgjojmë njëri tjetrin, të respektojmë njëri tjetrin dhe të ndajmë shqetësimet tona të përbashkëta, me njëri tjetrin”, tha Senatori demokrat i shtetit Delaware.
Ndërsa Senatori republikan i shtetit Oklahoma, James Lankford, bashkryetar me Senatorin Coons i tubimit të Lutjes së Mengjesit, është shprehur se, “Lutja është një fuqi bashkuese në atdheun tonë. Kur sfidat e jetës shtohen dhe kur politika na përçanë, lutjet na bëjnë të përqëndrohemi rishtas dhe të ri-angazhohemi ndaj marrëdhënieve tona me Perëndinë dhe me njëri tjetrin. Një prej lirive më kryesore në Amerikë është që të jetosh sipas fesë tënde ose të mos ndjekësh asnjë fe. Liria e fesë ka luajtur një rëndësi aq të madhe në themelimin e vendit tonë, ashtuqë është duhet të vazhdojmë të njohim rolin që kanë luajtur dhe luajnë lutjet tona ndaj Perëndisë në jetën e aq shumë amerikanëve, pikërisht nepërmjet tubimit Kombëtar të Lutjeve të Mengjesit.
Në një artikull të shkruar nga të dy senatorët, botuar në vigjilen e tubimit në fjalë, dy bashkyetarët e tubimit të Lutjes së Mengjesit u shprehën se takimi me rastin e Lutjes së Mengjesit na ndihmon — ndër të tjera — që nepërmjet lutjeve, të pajtohemi dhe të zhdukim grindjet dhe përçarjet midis nesh. “Është ky një rast dhe mundësi, që për 67 vite ka bashkuar kombet, fetë, grupet etnike dhe madje edhe politikën”. Ata bëjnë thirrje që të “Lëmë mënjanë dallimet politike, të bashkohemi rreth vlerave tona të përbashkëta, me qëllim që të zhdukim disa prej ndasive dhe përçarjeve në vendin tonë.” Ata shprehen se ndonëse të dy “Mbajmë qëndrime dhe pikpmaje të kundërta politike, ata ndajnë një miqësi të fortë me njëri tjetrin, që i ka rrënjët në besimin fetar dhe në angazhimin e tyre të fortë, në mbrojtje të lirisë së fesë.”
Në artikullin e botuar në disa media amerikane, dy senatorët rrëfejnë se ata së bashku me dyzina senatorë të tjerë, demokratë dhe republikanë, marrin pjesë — duke lënë mënjanë dallimet politike midis tyre – në lutjet e mengjesit, çdo të mërkurë në mjediset e Senatit Amerikan. “Të pakën për një orë në javë, të gjithë ne bisedojmë me njëri tjetrin mbi jetën personale dhe travajët e jetës në përgjithësi, këndojmë këngë fetare dhe lutemi për Kombin dhe familjet tona”, shkruajnë ata në artikullin e botuar të ënjtën. Senatorët Lankford dhe Coons, pranojnë se lutjet nuk i zgjidhin të gjitha problemet, por e bëjnë më të vështirë të kritikojmë ashpër njërin ose tjetrin prej kolegëve tanë gjatë seancave në Dhomën e Senatit, ndërkohë që atë mengjes mund të jemi lutur së bashku e dorë për dorë me kokën poshtë, theksojnë ata.
Në artikull, ata u bëjnë thirrje të gjithë “Republikanëve dhe Demokratëve si dhe Amerikanëve dhe miqëve tanë anë e mbanë botës, por edhe përfaqsuesve të gjitha feve, që të luten dhe të bashkohen me njëri tjetrin në lutje. Vetëm nëqoftse dëgjojmë mendimet e njëri tjetrit dhe vetëm nëqoftse lutemi së bashku për të ardhmen tonë — vetëm atëherë do të mund të pajtohemi e të zhdukim ndasitë midis nesh”, theksojnë senatorët dhe bashkryetarët e tubimit të Lutjeve të Mengjesit, mbajtur të ënjtën në Washington, në artikullin me mesazhin drejtuar të gjithë neve, jo vetëm ne këtu në Amerikë, por kudo në botë.
Këtë të ënjte, përfundojnë artikullin e tyre dy ligjëvensit amerikanë, “Tubimi me rastin e Lutjes së Mengjesit në Washington, “Do të bashkojë Kombin tonë në lutje”, ndërkohë që ata kërkojnë nga të gjithë që, “Të bashkohemi me ta, duke iu lutur Perendisë, jo vetëm për vendin tonë dhe për udhëheqsit tanë, por dhe për të gjithë udhëheqsit anë e mbanë botës.”
Ndër udhëheqsit ndërkombëtarë nga mbarë bota, të ftuar dhe të pranishëm në organizimin për Lutjen e Mengjesit ishin edhe delegacionet e dy shteteve shqiptare, Shqipërisë dhe Kosovës, të kryesuara anga Presidenti Ilir Meta dhe Presidenti Hashim Thaçi. Udhëheqsit shqiptarë, siç mund të shihet nga fotot më poshtë, patën mundësinë të përshëndeteshin me Sekretarin Amerikan të Shtetit, Michael Pompeo dhe me zyrtarë të tjerë të lartë të Administratës dhe të Kongresit amerikan.