Figurat e uniformuara me diploma të fabrikuara!

0

Shkruan Florim Zeqa

Kosova dhe Shqipëria janë dy vendet në rajonin e Ballkanit ku më së shumti fabrikohen tituj shkencor dhe akademik me diploma fallco, respektivisht, prodhohen kuadro pa mbulesë profesionale dhe intelektuale! Përderisa një pjesë e madhe e komandantëve të luftës u ngritën në gradën e gjeneralit pa akademi ushtarake, pjesa tjetër e politikanëve të pasluftës u ngriten në tituj profesional dhe shkencor pa hyrë asnjëherë në amfiteatrin e universiteteve private, pasi për universitetin publik të Prishtinës u kishte “ikur” mosha adekuate për studim!

Figurat e uniformuara politike dhe ushtarake, produkt i fabrikimit klandestin

Në Kosovë dhe Shqipëri dhe trojet shqiptare në përgjithësi, gjëja më e lehtë në rrethanat e pluralizmit politik, e në veçanti në periudhën e pasluftës, më së lehti ishte për t’u bërë gjeneral dhe intelektual. Përderisa për t’u graduar në gjeneral mjaftonin uniforma dhe disa foto të shkrepura gjatë kohës së luftës në Kosovë, për t’u bërë intelektual mjaftonte një kostum i bukur, një kravatë (kollare) dhe një palë syze me dioptri “00”!

Mirëpo puna më e vështirë kanë qenë titujt e ulët, siq është statusi i veteranit! Për të ardhur deri tek statusi i veteranit ishin një mori kushtesh që duheshin plotësuar, filluar nga afërsia familjare apo serviliteti ndaj liderëve partiakë të krahut të luftës dhe jo vetëm, ngase edhe disa  nga krahu paqësorë u bënë veterana pa qenë fare në luftë!

Në mungesë të këtyre dy të parave, është dashur ta kesh “xhepin e nxehtë” për të përfituar statusin e veteranit, pa të pyetur askush se pjesë e cilës brigadë apo zonë ishe gjatë luftës, madje pa të pyetur askush në cilin shtet evropian ndodheshe si azilant gjatë periudhës së luftës!

Ngritjes artificiale të veteranëve i parapriu ngritja artificiale e figurave të uniformuara, gjegjësisht gjeneralëve dhe intelektualëve, doktorëve të shkencave dhe akademikëve pa asnjë vepër shkencore!

Për këto anomali të dëmshme për të ardhmen e shtetit jemi fajtorë të gjithë ngapak, por më së shumti janë ata që prodhuan diploma fallco dhe jo vetëm, fajtorë janë edhe veteranët e vërtetë që e njohin mirë njëri-tjetrin nga koha e luftës, e dinë mirë kë e kanë pasur pranë në zonën, brigadën apo pikën e pozicionuar gjatë luftës çlirimtare!

Andaj, është krejtësisht e pajustifikueshme heshtja e luftëtarëve, veteranëve të vërtetë të luftës çlirimtare që nuk i denoncojnë veteranët e rrejshëm, filluar nga familja, lagja, fshati apo qyteti që i përkasin.

Ngase nuk e përballon asnjë lloj logjike e shëndoshë që statusin e veteranit që e gëzon ushtari i vërtetë dhe invalidi i luftës çlirimtare, ta kenë dezertorët, tradhtarët dhe matrapazët e luftës të cilët janë pasuruar mbi kurrizin dhe fatkeqësinë e një popullate të tërë!

Figurat e uniformuara, me aftësi të kufizuara intelektuale

Në dukje të parë, të gjitha figurat e uniformuara janë të njëjta, por kur i studion veprimet e tyre dhe kur i dëgjon fjalimet e tyre në parlament dhe nëpër studiot televizive, atëherë e vëren çartë dallimin në mes intelektualëve të vërtetë dhe pseudointelektualëve.

Shprehjet e ulëta dhe gjuha vullgare e shpërfaqin nivelin (e ulët) të intelektualëve me diploma universitare të fabrikuara apo të blera në shkollat e natës, të barasvlefshme me ciklin e ulët dhe atë parauniversitar.

Akoma më keq shpërfaqen figurat e uniformuara ushtarake apo gjeneralët e fabrikuar në takim me homologët e tyre perëndimor, kur përveq mungesës së njohurive të përgjithshme ushtarake, u mungojnë eksperiencat profesionale dhe strategjike në fushën e artit ushtarak.

Kësisoji, figurat e uniformuara politike dhe ushtarake me diploma të fabrikuara janë kthyer në pseudovlera, pasojat e të cilëve po i vuan një popullatë e tërë!

Arsyeja pse populli nuk reagon ndaj këtyre dukurive, sa të dëmshme po aq negative të shoqërisë sonë, është çështje për t’u diskutuar më thellë dhe më gjërë, por nuk mund të themi që nuk i njehë si të tilla. Ashtu siq di populli t’i dallon mirë pulat e “kamionit” nga ato të fshatit, i dallon edhe intelektualët e vërtëtë nga ata të fabrikuarit, i dallon veteranët e vërtetë nga ata mashtrues!

Leave a Reply

Your email address will not be published. Required fields are marked *

error

Nese e pelqyet ket artikull? Ju lutemi përhapni fjalën :)

Follow by Email
YouTube
YouTube
Tiktok