“Autogoli” i Albinit 5 minuta para përfundimit të ndeshjes!

Shkruan: Florim Zeqa

Largimi masiv dhe i organizuar i serbëve nga institucionet e Republikë së Kosovë të kujton kohën e shkëputjes tonë nga institucionet e shtetit të Serbisë, përkatësisht Jugosllavisë! Përderisa ne jemi larguar me dhunë nga vendet e punës prej regjimit të Millosheviqit, serbët po largohen me vetëdëshirë nga vendet e tyre të punës në shenjë mosnjohje ndaj institucioneve të shtetit tonë.

Targat shkaku, Asociacioni qëllimi i Serbisë

Pasi Qeveria e Kurti nuk e pranoi shtyerjen 10 mujore të afatit për ndërrimin e targave ilegale në veri të vendit, tani përpos suspendimit të këtij vendimi, SHBA-të dhe BE-ja po e kërkojnë me urgjencë zbatimin e marrëveshjes për Asociacionin të nënshkruar në Bruksel më 19 Prill 2013 nga ish kryeministri Hashim Thaçi, përkatësisht më 25 Gusht të vitit 2015 nga ish kryeministri Isa Mustafa.

Meqë, Asociacioni nuk mund të realizohet pa i pasur komplet funksionale institucionet komunale në veri të vendit dhe pa serbët në Kuvendin e Kosovës, rrezikohet përshkallëzim i situatës në veri të vendit!

Braktisja apo largimi vullnetar i serbëve (të komunave të pjesës veriore të Kosovës) nga të gjitha institucionet kosovare, nuk janë dorëheqje individuale siq po vlerësohen prej disave, por janë veprime të koordinuara politike me shtetin e Serbisë.

Çka pritet të ndodhë tani?

Pas largimit të Listës Serbe nga institucionet e Republikës së Kosovës po dëshmohet se ata nuk e kanë më qëllim Asociacionin pa kompetenca ekzekutive, por një status të veçantë që ju garanton autonomi të plotë dhe shkeputjën de-fakto dhe de-jure të veriut të vendit tonë.

Mospranimi i rekomandit të BE-së dhe SHBA-së për shtyrjen e afatit 10 mujorë për targat nga ana e kryeministrit Albin Kurti, me apo pa vetëdije e ka ndihmuar planin e serbëve për shpalljen e njëanshme të autonomisë së serbëve në veri, përkatësisht themelimin e Asociacionit me kompetenca ekzekutive.

Fatkeqësisht në këto rrethana plani “franko-gjerman” për normalizimin e raporteve në mes Kosovës dhe Serbisë, gjegjësisht normalizimit të situatës në veri të vendit mbetet i parealizueshëm, anipse ky plan nuk paraqet zgjidhje përfundimtare, por vetëm prolongim të situatës në veri.

Situata e krijuar pas mospranimeve të BE-së dhe SHBA-së u shkon për shtati vetëm serbëve për realizimin e planit për ndarjen e veriut, e fare nuk i shkon për shtati ruajtjes së integritetit territorial të vendit tonë.

“Autogoli” i Albin Kurtit 5 minuta para përfundimit të ndeshjes, e mënjanoi lojën shtesë (zgjatjen 10 mujore për targat) dhe me vetëdije apo pa vetëdije e përshpejtojë krijimin e Asociacionit me kompetenca ekzekutive, ashtu siq dëshion prej kohësh Serbia!

Këtë e vërteton deklarata e diplomatit amerikan në Prishtinë, Jeffrey Hovenier, i cili i bën thirrje Qeverisë së Kosovës, “që të mos vazhdojë me gjobat për qytetarët serbë në veri, por të zgjasë për dhjetë muaj afatin për riregjistrimin e makinave dhe që të fillojë urgjentisht negociatat për formimin e Asociacionit”.

Tërheqjet e serbëve nga institucionet e Kosovës janë të pakthyeshme

Largimi me vetëdëshirë i policëve dhe zyrtarëve serbë nga institucionet e Republikës së Kosovës nuk është një lojë siq po e cilësojnë disa, por një vendim i menduar mirë dhe i pakthim. Serbët e veriut tashmë i kanë ndarë rrugët me Kosovën, i janë kthyer shtetit të Serbisë. Ndarja de-facto e pjesës veriore 23 vite më parë, po legjitimohet tani me ose pa dëshirën tonë.

Kur e themë këtë, e kam parasysh faktin se për 23 vjet nuk bëmë asgjë për rikthimin e veriut, përkundrazi e ndihmuam ndarjen me themelimin e “Mitrovicës së Veriut” nga politikanët dhe ligjvënësit kosovarë të kohës.

Mitrovica Veriore është themeluar në vitin 2013 pas Marrëveshjes së Brukselit të vitit 2013, e cila komunë ishte planifikuar të jetë qendër administrative e Asociacionit të Komunave Serbe.

Ky është dhe mbetet një realitet i hidhur nga i cili nuk dilet lehtë!

Nëse deri më tani e kishim një fije shprese për shpëtimin e veriut, tani pas mospranimit të sugjerimeve të aleatit tonë të vetëm strategjik-Shteteve të Bashkuara të Amerikës, kjo gjë na bëhet gjithnjë dhe më e pamundur.

Duke e ditur se Politika si art i së mundshmes dhe jo art i drejtësisë, dëshirojë të shpresojë në atë që e thonë mbështetësit e kryeministrit, se “Albinit i kanë thënë amerikanët, vepro kështu me “Targat”, ndryshe, më asgjë nuk justifikohen veprimet e kryeministrit tonë pa e pasur mbështetjen dhe forcën e implementimit të ligjit për targat në veri.