Tragjedia mbulohet me llum politik…
Nga Nikoleta Kovaçi
Sod ishte nji ditë e trishtë! Katër djem, në kulmin e moshës humbën jetën në rrethana të tmerrshme. Ata lanë frymën e fundit poshtë nji makinerie që prej vitesh asht kthye në nji “killer” për shqiptarët, për ne që s’jena dhe sbahena pjesë e mafies që prodhon kjo makineri, poshtë së cilës na metën katër bij nanash!
Unë e di që fajtor do të shpallen ata, ata që s’janë ma, ata që s’ka kush i mbron veç lotëve të atyne qe prej 24 orësh po ju plas edhe zemra nga dhimbja!
Sigurisht se ata katër djem nuk kthehen ma, fatkeqësisht ikën duke rrenue tri familje e duke na lanë ne, qyqarëve, nan kthetrat e betonieres-vrasëse. As gëk as mek nuk nxorën sod, për gjatë gjithë ditës, pikërisht se na e kena të gatshme formën me gjet fajtorin: djemtë ishin me shpejtësi!
Në mëngjes të gjitha ekranet i zi kryeministri! Kudo pluskonin me të kuqe si pershtymë helmuese sharjet, mallkimet e premtimet e tij për pasaportën europiane, ndërsa 4 djem në kulmin e rinisë ishin ba shkrumb e hi. Ma vonë ekranet u zunë me nji lojë të ndyrë e kriminale me shkarkim, emërim, kthim në detyrë të nji kukulle në bashkinë e Tiranës, kryeministri nga burgu i madh e Erjon Veliaj nga burgu i vogël, morën tanë vemendje e për betonieren vrasëse me pagesë, askush nuk bani za, as nuk nxori za, madje as tingull!
Vijoi edhe gjatë mbramjes zullumi politik mjeran, ndërsa tragjedia e tmerrshme u izolue në Borizanën e vogël madje mos me mujt me kalue kufijtë e zonës, se mafia e betonit nuk asht dosido: nuk mund të përflitet, të hetohet, të preket, të ngacmohet!
Mafia e betonit asht lajtmotivi i kryeministrit, shpresa e kryetarit të bashkisë me dalë prej burgu, asht remorkio që do mbarti qeverinë e kusarët e ktij vendi deri te dera e parlamentit tjetër; asht garanti i ruajtjes së fuqisë së pushtetit për këdo që e llogarit betonieren si thesarin e vet…
E na të flemë të qetë, ani pse tri familje janë në gjamë të pashoqe, e të lutena që “betonierja” tjetër t’a ndezi ndonjë sinjal kur të rrijë në rrugë, që të paktën të mos na shkatërrojë edhe dekën!
Nikoleta Kovaçi
20.03.25
