Të gjithë në mbështetje të reciprocitetit për targat!

Shkruan: Florim Zeqa

Nga mëngjesi i së hënës, kur Qeveria e Republikës së Kosovës nisi zbatimi i reciprocitetit për targa të përkohshme për veturat me targa të Serbisë që hyjnë në territor të Kosovës, serbët lokal në shënjë proteste bllokuan rrugët në Bërnjakë dhe Jarinjë, me vendosjen e kamionëve të ngarkuar me zhavor duke bllokuar çarkullimin e makinave në të dyja drejtimet.

Vendim i vonuar, por i qëlluar

Edhe pas tre ditësh, situata mbetet e tensionuar dhe njëjtë, Njësitë Speciale të Policisë së Kosovës po qëndrojnë në pjesën veriore të vendit, por të pafuqishme për thyerjen e bllokadës së vënë nga serbët lokal!

Edhe pse vendimi i Qeverisë Kurti 2 për zbatimin e reciprocitetit për targat, i vonuar dhe jo në kohën e duhur (fushatë zgjedhore), është vendim i qëlluar dhe kërkon mbështetjen e të gjithë spektrit politik vendor në këtë momentum kohor shumë delikat dhe me rrezikshmëri të lartë shkaku i mundësisë së eskalimit të situatës nga provokimet e serbëve lokal dhe shtetit serb në veçanti.

Në asnjë rrethanë kërcënimet nga Serbia nuk duhet ta vënë në pikëpyetje vendosmërinë institucioneve të Republikës së Kosovës për zbatimin e reciprocitetit për targat dhe jo vetëm, duhet zbatuar në përpikmëri Kushtetutën për shtrirjen e plotë të sovranitetit në veri të vendit.

Kërkesë KFOR-it për largimin e barrikadave

Padyshim, se fjalët më të bukura që kam dëgjuar nga kryeministri Albin Kurti ishin ato në takim me përfaqësuesit e shteteve të Kuintit; “Për reciprocitetin e targave të përkohshme për vetura si Kosova dhe Serbia kanë të drejtë ,ose të dyjat e kanë gabim. Pra ose do t’i mbajmë këto lloje targash të dyja shtetet, ose do t’i heqim si Kosova dhe Serbia”.

Në situatën e krijuar, kur vendimi i qeverisë për reciprocitetin e targave nuk kundërshtohet nga vendet e Kuintit dhe as nga qendrat ndërkombëtare të vendosjes, kryeministri Albin Kurti duhet të kërkojë ndihmën e KFOR-it për largimin e barrikadave dhe kthimin e normalitetit, përkatësisht krijimin e kushteve për lëvizjen e lirë të qyetarëve në të dyja drejtimet.

Ndryshe, çdo vazhdimi i situatës bllokuese mund të shkaktojë trazira në pjesën veriore dhe ajo çka është më e rrezikshmja, trysnija ndërkombëtare mund të kthehet ndaj Kosovës për tërheqjen e trupave të Njësisë Speciale të Policisë, e cila do t’na kthente në situatën e 10 viteve më parë, në atë të 25 Korrikut 2011, kur Njësia Speciale e Policisë së Kosovës kishte ndërmarrë aksionin për t’i futur nën kontroll pikat kufitare në veri të Kosovës në Jarinjë dhe Bërnjakë, me ç’rast bashkësia ndërkombëtare e detyroj ish kryeministrin Hashim Thaçi të kthehej pas “me bisht nën shalë”, me një polic të vrarë (Enver Zymberi) dhe disa të tjerë të plagosur.

Të dëshmohemi si shtet dhe komb

Që kjo të mos ndodhë, kryeministrit të Republikës së Kosovës i duhet mbështetje e gjërë morale e spektrit politik vendor, nga autoritetet shtetërore shqiptare, shoqëria civile dhe të gjithë shqiptarët kudo që janë pa dallime partiake apo rajonale.

Është momenti i fundit që të dëshmohemi si shtet dhe si komb sesa jemi të vendosur për mbrojtjen e integritetit territorial dhe sovranitetit të shtetit të njohur ndërkombëtarsisht nga shumica e vendeve të botës.

Në të kundërtën rrezikojmë të trajtohemi akoma më keq sesa tani nga një pjesë e bashkësisë ndërkombëtare. Përderisa ne nuk e mbështesim njëri-tjetrin në situata të tilla, nuk kemi pse të presim të na mbështesim të tjerët!

Në përfundim të këtij shkrimi, dëshirojë të shtojë edhe këtë, çdo tendencë e Lëvizjes Vetëvendosje për abuzim të situatës së krijuar për qëllime elektorale, jo vetëm që nuk do ta ndihmojë, do ta vëjë për tokë këtë subjekt politik.