Marrina e budallaqe të rrezikshme

Nga Ndue Ukaj

Secili politikan që sot thotë se po i mbron interesat e Kosovës duke e kundërshtuar Amerikën e perëndimin, thotë marrina e budallaqe të rrezikshme, më e keqja e mashtron keq popullin e vuajtur të këtij vendi dhe rrjedhimisht bën një gabim të rëndë, një padrejtësi historike e që mund të kthehet në fatalitet.

Sepse, në një botë të turbullt e të pasigurt, pararojë e interesave tona është Amerika e perëndimi, aleanca e vendeve të lira dhe kjo e vërtetë s’ mund të mbulohet, për aq sa mund të mbulohet dielli me shoshë. Me perëndimin, në krye me Amerikën, kemi realizuar çdo gjë e pa të s’ mund të bëjmë asgjë, pos të hapim llogore e gropa të zeza, ku futemi e “mbrohemi” prej imperialzmit dhe vlerave të demokracisë perëndimore.

Sa herë në trojet shqiptare s’ ka mjaftueshëm vlera

perëndimore, hapen portat e ferrit, tmerrit dhe izolimit dhe këtë e dimë ne mirë.

Çdo konfrontim me perëndimin është në funksion të pastër të avancimit të intetrsave të Serbisë dhe është fort i pashëndetshëm për shëndetin e dobët të Kosovës, për të cilin kujdeset perëndimi.

Gjuha e përçartë e Prishtinës zyrtare tash e sa kohë i ka rrezikuar seriozisht aleancat tona organike me perëndimin.

Gacat e zjarrit antiperëndimor tani duken të vogla dhe ne duhet ta marrim ujë e t’ i fikim, sepse mund të bëhet zjarr i madh, ku mund të digjemi të gjithë.

Të rrezikosh raportet e shëndosha me perëndimin domethënë t’ i vendosësh kazmet në themelet e shtetit. Krejt justifikmet e tjera janë dokrra pa tro vlere politike, pos marrina në funksion të një tallavaje të brendshme politike, prej së cilës dikush mund të përfitojë pak vëmendje e pushtet, por populli i Kosovës mbetet më me pak shtet, më me pak zhvillim dhe më me pak siguri.

Historia më e re Kosovës është e lidhur organikisht me perëndimin dhe këtë të vërtetë duhet ta themi përditë dhe me zë të lartë. Për më tepër, këtë të vërtetë duhet ta kemi shujtë të përditshme në tryezën tonë politike.