Llumi ideologjik është duke udhëheqë Kosovën e Ibrahim Rugovës

Nga Ndue Ukaj

Çfarë llumi ideologjik është duke udhëheqë Kosovën e Ibrahim Rugovës, njeriut që edhe në kohë lufte e terrori fliste për paqe, vlera demokratike e shpirt të tolerancës – kjo duhet ta bëjë të ndihet të turpëruar çdo njeri normal.

Sot, secli njeri normal duhet të ndihet i turpëruar e me faj përballë kësaj katandije, përballë kësaj gjuhë të përdalë të pushtetit që tenton të përlyej çdo kënd që s’rreshtohet prapa tij.

Në të vërtetë kjo ideologji tash e gati 20-vjet ka tentuar t’i përlyej vitet më të bukura të Kosovës: vitet e lirisë, pavarësisë dhe rimbkëmbjes.

Thjesht, kjo që po ngjet me ne, s’është krizë, është dritë kuqe e alarmit dhe duhet ta tmerrojë çdokënd.

Kjo është shkallë kritike kur njeriu- siç do të thonte Zef Pllumi-  lehtësisht mund të shtazifikohet.

Sepse, kjo gjuhë e përçarjes dhe propagandës e stimuluar me epsh pushteti, veç gjuhë njerëzore s’është dhe veç Kosovës s’i shërben.

Nesër, me siguri kanë me pyetë breznitë e reja: si bani vaki që vendi i Anton Çettës, Ibrahim Rugovës e mijëra e mijëra studentëve paqëdashës, e luftëtarëve të paepur për liri, të katandisët në duar të një tufë injorantësh kaq mendjekëqij?

_________

Një njeri i kulturës, nëse vërtet është i tillë, përherë duhet të jetë me pakicat, me të dobëtit dhe kundër forcës absolute të pushtetit.

Një njeri i kulturës, nëse vërtet beson te forca e artit, zor bëhet militant, zor rreshtohet verbërisht prapa pushteteve, zor e ngrit zërin në mbrojtje të pushtetit, siomos jo të atyre pushtetëve dogmatike, të cilat s’ besojnë në liri politike, në tolernancë, por ethshëm angazhohen për liri ideologjike.

E liria ideoligjike është e kundërta e lirisë dhe këtë njerëzit e kulturës, nëse vërtet janë të tillë, duhet ta

kuptojnë.

Mjerisht, vendi ynë sot është në duar të njerëzve të paditur e të armatosun me urrejtje, prandaj askush s’flet për tema të bukura e humane dhe kjo dëshmon se larg qytetërimit jemi dhe në çfarë dergje jemi katandisë.

_________

Kur i shoh këto turma të shpërfytyruara si janë marrosë nga dëliri i pushtetit dhe e mbrojnë epshëm atë e kryeministrin, më shumë se lirinë e tyre, seç me sillet ndërmend Faik Konica dhe një tekst i tij i shkruar në vitin  1897, plot pezëm, kur donte t’iu tregonte shqiptarëve se ç’është liria.

“Janë nj’a 50 Shqiptarë që e kuptojnë ç’ është liria…Po të tjerët janë gomarë.”

Sot duke e parë forcën rrënimtare në këtë vend, s’ke çka të shtosh pos të përsëritësh me mërzi atë që thonte Konica.