KULLA E ISA BOLETINIT U MBUSH PËRPLOT ME PLIS BARDHË

Në kullën muze të Isa Boletinit u mbajt pjesa e tretë e edicionit të pestë të Manifestimit “Dita e plisit”
Nga Milazim F. KADRIU
Pjesa e tretë e Edicionit të pestë me radhë të manifestimit tashmë tradicional mbarëkombëtar “Dita e plisit” që është manifestim i ideuar nga Ismet Karasniqi – Lala e në përkrahje të Këshillit të përgjithshëm të njerëzve të kulturës e artit nga Klina ( Prend Buzhala, Idriz Berisha, Gjon Gjergjaj e Alban Gashi), kësaj radhe u mbajt në Kullën Muze të Isa Boletinit në Boletin të Shalës së Bajgorës. Organizimin kësaj radhe e mori përsipër Teatri i Qytetit “Sandër Prosi” në krye me Halit Baranin dhe institucionet kulturo-trashëgimore të Mitrovicës.
Manifestimi nisi me homazhet dhe vendosjen e kurorave pranë shtatores së Isa Boletinit në Mitrovicë dhe marshimin e pjesëmarrësve nëpër rrugët e Mitrovicës për të vazhduar më pas rrugën për në Boletin. Edhe në Boletin u bënë nderime pranë varrit të heroit Isa Boletini dhe u vizituan ambientet muzeore të Kullës së Isa Boletinit.
Në hyrje të kompleksit të Kullës së Isa Boletinit mysafirët nga trojet e ndryshme shqiptare u pritën ngrohtësisht nga burrat shaljanë të cilët u dëshiruan mirëseardhje në Shalën e Bajgorës, në Shalën e Isa Bolietinit.
Që në fillim të programit Ismet Krasniqi-Lala, tha se kësaj radhe moderimin e manifestimit do ta bënë njëri nga organizatorët lokal dhe ia kaloi fjalën Hysni Sylës, i cili fillimisht në emër të qytetarëve të Mitrovicës i përshëndeti të pranishmit dhe i falënderoi organizatorët që e kanë zgjedh këtë mes për të mbajtur pjesën përmbyllëse të edicionit të pestë të manifestimit “Dita e plisit”. Ndër tjera ai tha : ” Është një nderë i veçantë për ne shaljanët, sepse bartja e plisit ishte traditë e kamotshme shqiptare në rajonin e Shalës së Bajgorës dhe të Mitrovicës. Në fotografi të moçme që po dalin nga arkivat gjithandej, banorët e kësaj ane nuk ishin ndryshe, pos me plis.”
Më pas të pranishmit i përshëndeti dhe ju dëshiroj mirëseardhjeje edhe kryetari i Mitrovicës Agim Bahtiri, i cili edhe një herë tha se kjo tokë është e jona dhe e jona do të mbetet, nuk do të ketë ndarje të tokave shqiptare dhe as të kësaj ane. Pra Mitrovica do të jetë e pa ndarë tha Bahtiri.
Më pas me një fjalë para të pranishmëve u paraqit Rrezarta Loxha ,drejtoresh e Qendrës Rajonale të Trashëgimisë Kulturore në Mitrovicë, që e kishte mbështetur materialisht manifestimin e Ditës së plisit në Kullën e Isa Boletinit.
Gazmend Boletini, stërnip i Isa Boletinit para të pranishmëve foli me shumë emocione ngase ndjehej shumë i lumtur që ky manifestim mbahej në kullën muze të stërgjyshit të tij, për çka edhe falënderoi organizatorët dhe të gjithë pjesëmarrësit.
Monologu kushtuar plisit u pritë mjaft ngrohtë nga të pranishmit e të cilin e deklamoi Venera Bojaj.
Shkrimtari, publicisti dhe njëri nga organizatorët e përhershëm të manifestimit Prend Buzhala. para të pranishmëve u paraqit me kumtesën e tij mjaftë përmbajtjesore të titulluar “Kulla dhe plisi”.
Manifestimi si gjithherë u freskua me një këngë rapsodike nga Nazmi Hajdari.
Ndonëse ishte paraparë që në këtë manifestim të paraqitet me një kumtesë edhe Dr. Jahja Dtançolli, por siç u tha nga moderatori ai nuk ishte prezent ngase ndodhej në një aktivitet të rëndësishëm në Dubrovnik të Kroacisë, ku mban një ligjëratë për Gjin Gazullin.
Profesori dhe shkrimtari i njohur i Shalës së Bajgorës Fazli Hajrizi, para të pranishmëve u paraqit me kumtesën e tij të titulluar “Plisi i bardhë-pjesë e kostumit popullor dhe simbol mijëra vjeçar i shqiptarëve”.
Manifestimi u freskua edhe me një pikë muzikore nga grupi i rapsodëve nga Mitrovica e për të vazhduar edhe me disa fjalë përshëndetëse nga mysafirë nga troje të ndryshme shqiptare. Kryetari i shoqatës atdhetare “Dukagjini” nga Shkodra, Ndue Sanaj, pasi përshëndeti të pranishmit në manifestimin në kullën e Isa Boletinit, për Kullën muze “Isa Boletini” ndau mirënjohje dhe medaljonin “Mehmet Shpendi” të cilën me shumë respekt e pranoi Gazmend Boletini.
Pastaj përshëndeti Agron Isa Gjedia, kryetar i shoqatës “Bytyqi” Tiranë-Prizren, i cili ideatorit të këtij manifestimi i dhuroi dy botimet e kësaj shoqate që janë botime kushtuar plisit, aktivitet të cilin Gjedia më shoqatën e tij e realizon tash e disa vite në Tiranë. Po ashtu ai shpërndau edhe gazetën “Bytyqi” që e boton kjo shoqatë. Me fjalë përshëndetëse u paraqitën edhe Rrahman Lajçi, Avdyl Hoxha nga Oda e Junikut, Ramë Mrija nga Tropoja,Vlora nga Amerika, prof. dr. Mehmet Rukiqi etj.
Edhe rapsodët nga Shkodra ia thanë këngës në Kullën e Isa Boletinit, më pas u ndan disa mirënjohje nga Teatri i qytetit “Sandër Prosi” për ata që dhanë kontributin më të madh në organizimin e këtij manifestimi.
Në fund duke e shpallur të mbyllur aktivitetin e kësaj dite, ideatori i manifestimit Ismet Krasniqi-Lala pasi ka falënderuar pjesëmarrësit tha se në të ardhmen nuk do të quhet më Manifestimi “Dita e plisit”, por do të jenë “Ditët e plisit”,e që paralajmëroi se në vitin e ardhshëm aktivitetet “Ditët e plisit” do të mbahen ne Jezerc të Ferizajt, në kullën e Ahmet Delisë në Drenicë, në Zym të Hasit.
Si zakonisht për të pranishmit vendasit kishin shtruar ushqime tradicionale. Edhe në hapësirat jashtë kullës muze nuk mungoi kënga dhe zëri i ëmbël i çiftelisë, sharkisë e lahutës që tingëllonin aq bukur në këto male të larta të Shalës së Bajgorës nga Rapsodi Nazmi Hajdari me grup, dhe grupet rapsodike nga nga Shkodra e Mitrovica.
Ashtu si erdhën pjesëmarrësit edhe u larguan nga kompleksi i kullës muze të “Isa Boletinit” të përcjell nga burrat e kësaj ane.
Pjesëmarrësit aty ku u takuan pranë shtatores së Isa Boletinit në Mitrovicë aty edhe u ndalën sërish për të marr edhe ndonjë foto dhe për tu përshëndetur me dëshirën që të takohen edhe në manifestimet tjera të radhës.