Familja Kurmemaj fëmijëve më në nevojë të Rozhajës u ringjalli shpresën për t’u ndierë të paharruar, të dashur e të mirëpritur
Nga Gjekë Gjonaj
Çifti i dëshmuar humanitarë, Dina dhe Ahmet Kurmemaj, mërgimtarë në Shtete të Bashkuara të Amerikës, përmes Fondit Humanitar Shqiptaro -Amerikan “ Trojet tona”, vazhdon misionin e vet humanitar. Këta njerëz bamirës me shpirt dhe zemër të madhe sërish u treguan të gatshëm për të ndihmuar njerëzit në nevojë në Mal të Zi. Fokusi i tyre i radhës kësaj herë ishin fëmijët më në nevojë të Komunës së Razhajës, të cilët janë të prekur nga sëmundja e diabetit të tipit 1, fëmijët me paralizë cerebrale dhe të gjithë fëmijët e Qendrës Ditore. Këto ndihma financiare dhe dhurata u ndanë, më 27 dhjetor 2023, në sallën e leximit të Bibliotekës së qytetit të Rozhajës dhe në ambientet e Qendrës Ditore.
Në ceremoninë solemne të ndarjes së këtyre ndihmave fëmijëve më në nevojë të Rozhajës, të pranishmëve iu drejtua koordinatori i Fondit Humanitar “ Trojet tona” për Rozhajë, Haxhi Lajçi, i cili falënderoi donatorët për punën e tyre humane. “ Fondacioni Humanitar Shqiptaro-Amerikan ,,Trojet Tona “ ka ndarë mjete financiare dhe dhurata për këto grupe të fëmijëve që kanë nevojë për përkrahje: 12 fëmijëve me diabet , 3 fëmijëve me paralizë cerebrale dhe të gjithë fëmijëve të Qendrës Ditore. Gjithsej janë 25 fëmijë. Idenë tonë, të doktor Jaho Pepiq dhe profesoreshës Sena Tahiroviq, për përkrahjen e këtyre fëmijëve më në nevojë, e kuptuan shpirtërisht dy bashkëshortët afaristë të shquar, anëtarë të Fondacionit ,,Trojet Tona,, , Dina dhe Ahmet Kurmehaj, të cilët janë njerëz të mirë, humanist të kujdesshëm, sidomos për qytetarët e Malit të Zi. Ata janë njerëz zemërgjerë, vizionar dhe të përkushtuar për njerëzit që kanë nevojë për mbështetje. Përveç kësaj ata posedojnë një shpirt human, sakrifikojnë pasurinë e tyre për të tjerët, janë dritë dhe shpresë për të ata që kanë nevojë për përkrahje.”, theksoi ndër të tjera Lajçi.
Me këtë rast folën edhe Dr. Jaho Pepiq dhe profesoresha Sena Tahiroviq, të cilët kanë përgëzuar fëmijët përfitues të ndihmave dhe kanë falënderuar çiftin Kurmemaj që ndihmuan me mjete të veta financiare fëmijët e Rozhajës që kanë nevojë për ndihmë.
Familja Kurmemaj me këtë donacion fëmijëve në nevojë të Rozhajës dëshmoi atë që kërkohet prej nesh: dhembshurinë ndaj të gjithëve, veçanërisht ndaj fëmijëve që janë të sprovuar nga sëmundjet dhe dhimbja. Shembulli i tyre fisnik rindez shpresën për një njerëzim të ri, më të drejt dhe vëllazëror, ku të gjithë mund të ndihen të paharruar, të dashur e të mirëpritur.
